可能現實生活太多不如意事，近排童話特別受歡迎,好似賣個滿堂紅的《哈利波特》、《麥兜故事》，連白鴿黨的鄭家富亦於自己的網頁中開闢一個「橡筋褲的童話世界」做講古佬。
阿富童年時花名叫橡筋褲，佢話自參選拉票開始已不時落區講故事，重夢想開「橡筋褲書店」，專賣兒童書，和不良文化抗衡。可惜自九一一後經濟差，籌不到錢，倒不如上網講古仔更經濟，找朋友幾百元友情價就搞掂（ http://www.chengkarfoo.net/story/index.htm ）。
故事由阿富真人發聲，內容主要和兩個女兒一起創作，每個月新增三個故事，每個約十分鐘。第一炮有「大鼻子叔叔」、「金牛」和「三胞胎王子」。「三胞胎王子」原來是華叔的創作，曾於基本法草委會上講過。內容是講一個國王決定不了由三胞胎中哪一個王子繼位，飲完神仙水之後就話改用一人一票選領袖，華叔講完梗係冇草委鼓掌，不過阿富同細路講就好受歡迎，真係同人唔同命。
（圖）阿富後面的電腦螢幕上，是他一對女兒毛毛和豆豆，童話故事亦是父女一起創作。


E-mail：[email protected]