今日有周刊話67歲嘅李司棋拍完《溏心風暴3》之後元氣大傷，加上耳患又嚴重咗，所以有意收山養病，今日司棋姐接受傳媒訪問，佢直言話自己今次真係有啲唔開心，仲話真係要火姐上身，火都嚟呀！

司棋姐話：「好可惡呀，成日都係咁樣，都唔係第一次，15年喺中環影到我，嗰次係照完腸鏡返去聽報告，可能樣衰衰冇化妝，佢哋影完之後，隱瞞話到我好似好嚴重，結果搞到其他人走嚟問候我，我收咗94個WhatsApp，點知今次仲大鑊。」

司棋姐續稱：「我明白做呢行要食得鹹魚抵得渴，但係冇理由一、兩年就整我一煲。自己係一個實實在在嘅老實人，唔稀罕博呢啲新聞，但係竟然咁咬實我唔放，講到我好似就嚟死咁，真係要火姐上身，火都嚟呀，下次真係唔睬佢！」

講到收山，司棋姐就話：「你要咁睇，做我哋呢行，就算話唔做，出街啲的士哥哥又會問你：『司棋姐，幾時再拍戲呀？』去飲茶又會好好招呼，所以係唔會有真正嘅退休，做公眾人物係一生一世，我已經睇化，我係唔會再做嗰啲日以繼夜、夜以繼日嘅工作，我真係做唔到，真係好攰，我只係呢種退休，你唔俾我抖好精神，真係好影響健康㗎！」

「後生個我嘅都要求要睡眠，我哋呢啲一路路年長，老過你哋，都有資格講要瞓覺，好彩我阿媽唔喺度，唔係真係嚇死佢！今次真係有啲唔開心，唔好玩呢啲嘢！」

更多娛聞，喺晒《娛果》
http://fb.com/appledailyent