當年今日

最新MG版高達Z-plusC1型 比舊款A1型變化更多

蘋果日報 2002/03/03 00:00


踏入馬年不久,Bandai又推出新款MG版1:100高達模型,就係喺「高達前哨戰」中登場嘅Z-plusC1型,大家唔好以為同舊年11月推出嘅A1型差唔多,其實廠方根據設定已作出唔少改動,更加好玩。

文、模型製作:姚兆偉 攝影:陳盛臣
源自小說故事
各位高達Fans可能對「高達前哨戰」認識唔深,其實佢係早幾年喺HopbyJapan中連載過嘅高達小說,從來都冇動畫推出,不過就有台灣版嘅中文繙譯小說,大家不妨買嚟睇睇。Z-plusC1型係宇宙用量產型號,故事中配置於「a特別部隊中」,兩架Z-plus支援S-Gundam戰鬥,而上次出過嘅A1型紅白色機體係大氣圈內專用機,兩者有很多不同。
宇宙用機體裝備較多
上次A1型激光炮係將槍同盾分開,今趟C1型係將兩者結合起來,激光炮嘅長度更誇張,重高過機械人,變形成飛機後加喺機頭,使成架飛機更為流線型,相比之下更有氣勢!第二個分別就係C1型嘅背脊多咗對噴射器同四支能源棒,加強宇宙活動時嘅機動性。
變形方式與A1型大同小異
C1型同A1型嘅變形方式大同小異,關節之間有預留些少虛位,變形時應該唔會刮花顏料。武器方面除激光炮之外,重有一對激光劍,同安裝喺大腿頂部嘅小型激光炮。駕駛艙蓋打開後,可清楚見到駕駛員。除咗頭部、腰部之外,激光大炮、護盾以及主翼下面嘅能源管都需要修補夾口,比較花時間。

新款C1型vs舊款A1型
最新HG模型 沙漠型大魔
最近HG模型亦有新款推出,就係喺「高達0083——自護之殘光」劇場版中,搶奪GP-02時出過場嘅沙漠型大魔。雖然係1:144模型,不過各種裝備都好齊全,計有90mm機關槍連彈匣、大魔專用榴彈炮、手榴彈4支以及激光劍1把。