宣萱和袁文傑因劇集效應密密賺外快，今日一齊到將軍澳為Popwalk (天晉滙)商場舉行揭幕。宣萱提到自己管理工作兩年，未來會有新合作方式，將會同相識多年古天樂合作。

宣萱因「Mall姐」一角令近期工作量大增，佢話：「會同古仔合作，十幾廿年前Ronnie（古天樂執行經理人）睇過我，冇諗過o依家再合作，大家會試吓，唔想簽死，睇吓夾唔夾。我鍾意拍劇，主持司儀係我弱點，近期廣告活動都多咗，自己真係招架唔到，現時選擇工作會平衡自己生活，要食飯、見朋友、顧及屋企人，現階段希望搵人幫輕，公司唔會逼我做任何嘢，自己接到工作自己做， 如對方接到我哋大家再傾。」

問到未來同古仔有冇咩大合作？宣萱賣關子，但就話遲啲會同對方一齊接受訪問。古仔一直都想搵原班人馬開拍《尋秦記》電影版，宣萱話：「未問佢，都講咗幾年，問番佢啦！如果搵我我會做，因為係滿足fans，等於《刑事偵緝檔案IV》我同古仔一樣，o依家仲有好多人私訊我話『你哋兩個都冇拍拖？不如你哋拍拖啦！』感情隨緣啦，o依家係有人追不過唔適合。」咁有冇考慮古天樂呢？宣萱話：「做朋友幾好吖。」

問到宣萱係咪有好特別條件？宣萱有所領悟話：「近年聽朋友講好多婚姻問題，我認為拍拖要好似做朋友一樣，唔可以太過管束對方，黐住對方，我o依家大個咗習慣自己生活，總之千祈唔好啄住佢，有適當關心，自己半個男人性格，要學女性一啲，要俾人幫，男人鍾意幫女仔，o依家係吸收緊，prepare好自己有機會時候就會令自己做得好。」

袁文傑接咗咁多工作應該儲夠老婆本？佢竟然話：「我都係少少哋啄吓啄吓，有得做就最開心，努力中。」買樓先定結婚先？袁文傑話：「如果兩樣俾我揀會結婚先，自己住嘅地方雖然係租，但好滿意。」至於幾時落實娶女友張潔蓮？袁文傑話：「都要配合進度，除非結婚我超級低調，如果唔係都要安排同籌備，同女友共識呢兩年內啦。」