盧巧音(Candy)、蘇浩才(Sammy)、Super Girl嘅 Cheronna同Jessica等，噚晚去到銅鑼灣出席波鞋宣傳活動。

盧巧音同老公Sammy拖手出席，盧巧音早前 同老公行山巧遇發哥周潤發，Candy話：「我哋比較少行山，多數跑步，今次行山離遠見到一個好高大嘅型男，原來係發哥，佢仲幫我哋攞電話影合照，發哥好nice，我入行咁耐都係第一次見佢，自己好鍾意佢，難得見到佢，自己表現都傻傻地嘅表情，發哥又教我哋點行山。」Sammy話：「發哥忠告我哋，後生仔唔好去到咁盡，又話練氣唔係咁練。」

Candy同老公二人早前到加拿大登台演出，Sammy指其屋企人早於70年代已移居當地，今次係首次見佢攞住結他演唱。

Supergirls 嘅Cheronna同Jessica都話，平時收到好多波鞋贊助，Cheronna話：「試過一次收到5對，媽咪見到都好頭痛，多到着唔晒，不過着新波鞋出街真係好開心，有時媽咪都可以同我着母女裝。」問佢有冇益男朋友黃奕晨，Cheronna話：「有試過問客戶有冇優惠價想幫男友買一對特別版波鞋，對方好好送咗一對畀我哋好開心。」Jessica就話：「收到好多波鞋，同樣令到媽咪好頭痛，不過自己係慳妹性格，唔捨得拆新波鞋嚟着，經常着番同一對。」

精選娛聞，喺晒《娛果》
http://fb.com/appledailyent