當年今日
關於我們

【離奇連場坐冷板】騎師祈普敦自爆與賀賢有關!

蘋果日報 2017/06/14 15:00

賀賢祈普敦潘明輝火車潘

見習騎師10磅仔「火車潘」潘明輝喺香港上陣2個月左右,迅速獲馬會開綠燈,允許他今晚(14日)起首次喺跑馬地出賽。季尾戰馬有10磅減威力非同小可,另一邊廂祈普敦就當黑,上期「智愛」入閘後發老脾起擒,祈普敦被拋起,背部肌肉撞到閘廂,好彩傷勢輕微,但當日他須退下火線。
最慘原本祈普敦騎嘅「駿明珍寶」同「美麗寶寶」易配潘頓贏晒。今晚小祈竟然只得第5場「金碧旺旺」一匹座騎,小祈今季都有39場頭馬,問佢今次發生乜事支持度急跌,佢話除咗「金碧旺旺」,原定會騎「金禧足球」,但排位前因健康問題退出,仲有一個原因喺同「火車潘」有關。
「火車潘」師傅賀賢今次有5匹賽駒由徒弟上陣,但上星期四報名表公佈後,馬會仍未作決定讓潘明輝喺跑馬地出賽,賀賢當然要有兩手準備,立即mark實小祈,萬一「火車潘」未跑得,多匹戰馬就轉交小祈壓陣。換言之小祈角色有啲似「後備騎師」,而他亦因此不接其他馬。
直至上星期六谷閘結束後,馬會才開綠燈畀「火車潘」喺跑馬地出賽,故此一批賀賢賽駒,順理成章畀「火車潘」執韁,小祈因此多場坐冷板。