中環在線：
澳門「發財巴」瞄準港珠澳橋 - 李華華
蘋果日報 2018/06/11 05:20
中環在線港珠澳大橋發財巴
澳博話6間博彩公司有意喺港珠澳大橋邊檢大樓，用聯營發財巴接載客仔。資料圖片
港珠澳大橋通車在即，澳門賭企為咗吸納遊客，梗係有啲計仔。噚日澳博行政總裁蘇樹輝就話，6間博彩公司同政府傾緊「聯營發財巴」嘅方案，首先喺港珠澳大橋邊檢大樓，用聯營發財巴接載客仔到外港碼頭及北安碼頭，然後分流接駁到唔同酒店或賭場。
好處係用盡車位
蘇樹輝話咁樣做可以減輕港珠澳大橋開通後嘅交通壓力，未來想推展至其他口岸，例如關閘口岸，但𠵱家仲未傾。梗係啦，如果每個賭場都整個發財巴喺口岸，好容易擠塞，真係賭運都塞住塞住，聯營巴嘅好處就係可以用盡車位，落咗車之後想去邊個賭場，到時自己再決定，不過到時究竟要派幾多架車先夠用？蘇樹輝話呢個仲要傾喎。
另外，記者見到佢，當然想問吓賭王何鴻燊退休之後公司會點，佢就話公司唔會改變發展方向，董事局會繼續協助公司發展，又話過去多年運作暢順。至於賭王近排身體點樣呢，查實前排四房長女何超盈上內地節目做訪問，share咗條片見到賭王可以慢慢行路，而且精神都唔錯，華華希望佢身體健健康康啦！
另外，記者見到佢，當然想問吓賭王何鴻燊退休之後公司會點，佢就話公司唔會改變發展方向，董事局會繼續協助公司發展，又話過去多年運作暢順。至於賭王近排身體點樣呢，查實前排四房長女何超盈上內地節目做訪問，share咗條片見到賭王可以慢慢行路，而且精神都唔錯，華華希望佢身體健健康康啦！