【咁厲害呀?】同40吋巨胸森美玩鬥大 高海寧:我真係認輸
高海寧森美方力申
方力申、蘇麗珊、高海寧、袁文傑噚晚喺奧海城出席《愛情奴隸獸》首映禮,蘇麗珊性感低胸透視裙,反而咪神高海寧就收起性感,只係露出小蠻腰,認真失色!
罕有性感嘅蘇麗珊話:「好健康呀!件衫自己揀。男友有畀佢睇過,唔係好性感啫。」隔離嘅方力申就口痕話:「會唔會行多啲呢啲健康路線,可以行遠啲、行長啲喎。」今次小方同蘇麗珊有親熱戲,小方話:「其實呢類戲份唔多,始終我大佢唔少,大佢一個圈,費事畀網友鬧喇,本來冇乜後悔,o依家有啲後悔。」蘇麗珊即賣口乖話:「你唔講,唔覺得大家年齡有好大差距。」
只係露腰嘅高海寧,佢話早前同森美、黃心穎去日本拍旅遊節目,身為「咪神」嘅佢,竟然輸咗俾40吋巨胸森美:「之前大家講笑話鬥大,結果係佢贏,我真係認輸,佢操到好弗、好大隻,同佢去浸溫泉,我係浸喺水裡面,佢就喺水上面扮大隻。」
今次喺戲裡面高海寧會借位狂摑小方19巴,但係之後俾方力申真打咗一巴,佢話:「我摑佢嗰19巴就借位拍,佢摑我嗰一巴就好堅、好響,自己都係第一次畀男仔打,所以印象好深,摑完塊面腫咗,仲不停標眼淚,導演仲即刻衝出來話呢巴真係好大聲。」