當年今日
關於我們

特首辯論個壇 邊個起最啱 - 李八方

蘋果日報 2007/02/05 00:00


連任冇難度嘅煲呔,無論見選委定上街宣傳都自己話晒事,鍾意落閘就落閘,鍾意行商場就行商場,高高在上都有450票撲埋嚟,真係巴閉過打工皇帝!弱勢袋巾擺局挑釁煲呔玩口水戰,煲呔又要自訂規矩,講明只會上第三者擺嘅擂台,係咪暗示班大狀唔得公正先?煲呔對壇主認真揀擇,好彩香港人才濟濟,仲有大把人任佢揀。
特首候選人辯論壇主首選當然係賭王燊哥啦,佢以前挺董𠵱家挺曾,認真識得下注。雖然佢畀足煲呔100分,又話「梁家傑係絕對冇(勝算),係Zero,係雞蛋」,但正所謂有賭未為輸,擺煲呔同袋巾企喺賭枱上互放飛劍,700萬港人可以賭吓邊個拗得贏,小圈子選舉變成大圈子賭局,呢啲先叫全民參與嘛。賭枱上乜都可以發生,一旦袋巾爆大冷贏咗,唔知燊哥會唔會講:「老董迫我講咗七年大話,家吓煲呔又要炒魷魚,都係傑哥你至醒!」
如果賭王唔制,可以考慮搵巴士阿叔陳乙東吖。佢話晒早年參選過特首,雖然一個提名都冇,但勝在中氣十足,喺巴士一罵成名後,全球網友邊個唔識UncleBus?辯論擂台最好喺開篷雙層巴士上面搞,順便巡遊全港景點,再連接YouTube直播,肯定high過乜乜高峯會,但最怕係到時有人講粗口,廣管局想禁都禁唔到。不過巴士阿叔好似話今年都想選喎,如果佢做壇主可能有利益衝突,咁仲有邊個可以做獨立第三者呢?
煲呔嘅前老細陳太就話搞手唔重要,最緊要係拗得好睇。陳太話會睇清楚袋巾同煲呔嘅政綱先決定支持邊個,咁公正唔做公正人嘥咗喎。

林海峰是但噏好過

不過咁,煲呔同袋巾份人都悶悶哋,都係最好搵個鬼馬壇主搞搞氣氛啦。喺電台吹水多年嘅林海峰,噚日喺觀塘apm商場為一齣電影搞宣傳,司儀問佢新年最想做乜,佢就答:「我會做好呢份工!」呢句劣評如潮嘅屎撈緊(slogan)出自佢口,台下觀眾即刻笑到碌地,化沉悶為爆笑,佢做壇主是但噏,場騷肯定好睇過棟篤笑。