第一屆《馬來西亞金環獎頒獎典禮》噚晚喺雲頂舉行，曾志偉憑電影《一念無明》獲頒「最佳男演員」，成為頒獎禮第一個影帝，角逐「最佳女演員」嘅惠英紅，就輸咗俾德國演員桑德拉惠勒（Sandra Huller）。

再睇睇得獎名單……黎明獲頒終身成就獎？唔好搞錯！攞獎嘅唔係我哋嘅「明福俠」黎明，而係來自馬來西亞嘅資深女演員黎明（人稱：黎明姨）啫！

黃秋生、何超儀兩個齊齊頒「最佳女演員」，仲台上一唱一和放笑彈，超儀問秋生拍戲會點揀對手時，秋生反問佢係咪想問佢點揀女主角？然後笑住話：「基於我最近咁嘅情況，有戲拍都已經好好啦！唔信你問下志偉啦！」

然後秋生又抽奧斯卡頒錯獎嘅水，叫超儀睇清楚先講。而今次有份頒獎嘅嘉賓都唔少，除咗同時有份參選嘅惠英紅同曾志偉，仲有金燕玲、葉蘊儀、楊怡、吳卓羲同李心潔等人。