吳千語、郭永淳同太太楊愛瑾（Miki）、李玟（CoCo）、馬詩慧同大女王曼喜等，今晚喺中環出席Delvaux皮具品牌活動，千語BB下個月會先後到上海、杭州、福建等地拍電視劇，問佢呢排係咪爭取時間同男友林峯拍拖？佢話：「大家都好忙，佢要準備演唱會，我部劇有好多對白要記，對我嘅普通話同中文能力都係一項挑戰，我都未試過。」林峯拍內地劇經驗咁豐富，千語BB大可請教男友？佢即改口話：「我都OK嘅，不過佢就經驗豐富，佢非常之忙，每日都要練舞，但都有問我得唔得，頂唔頂得順？我同佢講做嘢啫，又唔係未拍過。」

下個月27號係千語BB嘅24歲生日，預計要喺大陸度過，佢話其實唔止生日，連聖誕、新年，估計都要喺當地度過，到時或者要夾時間同男友見面，拍完之後就可以放假去玩，到時會同男友或朋友一齊去旅行。講到林峯話為爭取時間見面，女友都會上佢屋企過夜，千語BB坦言：「好正常啫，我哋都咁耐，有咩未見過，已經5年啦！大時大節都冇咩感受，人大咗，就發覺都係咁過。」問到點樣保鮮？千語BB話唔太需要呢樣嘢，大家嘅重心都放咗喺工作上，互相支持就係最好嘅保鮮方法。