樟木頭研究所 - 谷德昭

蘋果日報 2007/04/30 00:00


《蜘蛛俠》第二集找來金像編劇編寫劇本,細意描繪蜘蛛俠褪下面具制服後過的普通人生活,錢唔夠使,業主催租,女友飛上枝頭變明星兼夾第三者介入,細膩的人情世故配合蜘蛛俠盪來盪去打怪獸,罕有地第二集好睇過第一集。
《蜘蛛俠3》千呼萬喚始出來,一襲黑色新制服教擁躉們興奮期待,除了想看蜘蛛俠換上新制服後的雄姿及威力外,還有跟流沙人及外星黑蜘蛛的大戰,蜘蛛俠更要面對內患,克服心魔的侵襲,咁多嘢睇,你話係咪未入場先興奮?
原來除了上述種種吸引入場的煞食元素之外,還有比第二集更多的人情世故,人物之多及關係之複雜媲美《十分愛》,蜘蛛俠因為得人愛戴得滯而起心魔,女友因唔得人愛戴得滯而冇得做明星,有錢同學又係第三者又係怪獸又係超人又係好朋友,上集殺Uncle兇手尚未落網需繼續緝兇,流沙人背後又有本難唸的經……基本上以上所提及的,求其兩、三條橋經已夠開一齣戲,如今多橋成咁,唯一結果便是太密,密得有點噆氣、有點煩。努力係咁寫橋,但對某些細節卻兒戲處理,流沙人之所以成為流沙人係因為誤墮高科技裝置,該裝置高科技到可以將任何物體的粒子拆散再重組,完全唔提該裝置究竟用嚟做乜都算,如此高科技竟然有如常平樟木頭研究所一樣,求其用鐵絲網圍住就算,三扒兩撥就可翻入內,確係有啲冇癮。
第三集唔夠頭兩集好睇,但又有咩所謂,反正大家都咁想睇套黑色制服,咁大齣戲又點忍得住唔入戲院睇,反正都會睇,因為抵睇,冇乜得揀。