美國導演米高摩亞（MichaelMoore）自從拍咗《美國黐GUN檔案》同《華氏9/11》兩套話題紀錄片之後，佢嘅偏激拍攝手法惹嚟唔少批評。米高早前宣布將會拍一套揭露美國藥劑業同衞生界醜聞嘅電影之後，全球六大藥廠聞風喪膽，日前重喺員工報章頭版登咗米高摩亞張相，叫所有業界同行一見到佢就要立即封嘴。

唔准員工答問題
米高早前宣布將會拍一齣叫做《Sicko》嘅電影，希望揭露美國藥業同衞生界嘅陰暗面，預計喺○六年上映。米高接受訪問時話美國人已經習慣咗接受藥劑業嘅劣質服務，又話希望美國人睇完佢套片後，可以重新估計呢個千瘡百孔嘅衞生服務界。
但每年營利數以十億計嘅全球六大製藥廠，像葛蘭素史克（GlaxoSmithKline）、阿斯利康（AstraZeneca）等聽到呢個消息後，有藥廠即時透過員工報章公布消息，重登埋米高個嘜頭，叫所有員工一見到個成日戴住棒球帽嘅肥佬就應該即刻走頭，千祈咪答任何問題，費事佢哋對住鏡頭講錯嘢，因為套片一出街，全球就有幾十億觀眾睇。

藥廠斥米高主觀
藥廠阿斯利康個發言人話：「米高拍親嗰啲戲，似劇情片多過似紀錄片，所以我哋假設《Sicko》係套主觀同唔公平嘅電影，係人都知米高摩亞個底花晒㗎啦！」