雷神贏開有條路，第三、五場勝出一對大熱門葉廐「勝在煌」及姚廐「奮鬥雄心」未夠喉，到了第六場四班1600米，新接手東廐「尊兄」，後上彈甩對手，3.5倍掄元，跑完上半場佢已經大演帽子戲法，拋離潘頓於騎師王領前。
「尊兄」由韋達騎開，這天適逢佢停賽，加埋人馬合作屢拼不逞，結果由雷神走馬上任，「尊兄」排11檔本來形勢欠佳，但雷神施以其神級走位，一早如燕子般飄到移入二疊有遮擋位置，其後進一步移入近欄，唔使蝕位慳力，末段靈巧地找到空位竄上，越追越勁，輕易趕過放頭馬「紫電明珠」勝出，為此駒打開今季勝門。
今場蔣嘉琦策「紫電明珠」全無犯錯，留放亦極佳，但撞正雷神完美演繹，結果落飛着綠燈力拼跑第二，雖敗猶榮。
大熱門「勇冠王」首配潘頓，成條直路於外欄一直內閃側住個身跑，卒之後上不及只得第三，雷神「尊兄」搭潘頓「勇冠王」大熱Q無緣開出，落飛黨則大話夾好彩，中正「尊兄」搭「紫電明珠」15倍綠燈Q，第四名「火龍寶」，四重彩派4,194元。