李添勝今日應吳雨邀請，到其商台節目接受訪問，大談當年喺無綫嘅點滴。現已退休嘅添哥話o依家每星期會游四次水，幫助強化腰背肌肉，免得腰骨移位嘅痛症惡化。

吳雨指當年李添勝想拍金庸劇集，就全權交佢負責，而梁家樹同曾勵珍就負責另外兩個劇組，講到係咪黨派鬥爭大，添哥笑住話：「我聾嘅，乜都聽唔到。」吳雨就話添哥真係耳聾，但就心不盲，而添哥亦慨嘆現時大台演員年齡層不多，缺乏甘草，拍唔到類似金庸需要多種類演員嘅劇集。

對於退休前監製嘅劇集《巾幗梟雄之諜血長天》將於下周播出，添哥就話播劇方向都會先喺網上播，再到免費電視，另外臨走前有部賀年劇都快播出，吳雨問到《諜血長天》係咪有雞姦鏡頭，添哥話：「一定有無謂人搞鬼，我做咗幾十年，畫面一定出到鏡，但氣氛意識好睇人點睇。」