梁烈唯上個月喺新劇《飛虎極戰》中，被車撞到凌空飛起，搞到膝頭同小腿撞到一撻紅一撻紫咁。最終要call白車送院，休養兩個禮拜先復工。(新聞連結： http://bit.ly/2wxadNb )

上周四(21日)夜晚約8點，已經康復得八八九九嘅梁烈唯，同王梓軒喺蘭桂坊拍新劇《是咁的，法官閣下》，當晚場戲係講飾演大律師嘅佢哋，賀朋友餐廳開幕，結果飲醉酒嘅梁烈唯，離開餐廳嗰陣，喺褲袋拎電話出嚟時，唔小心跌咗部電話落地，梁之後執番，望吓電話有冇跌花撞爛，跟住就跌跌撞撞上車走人。

劇情唔算高難度，不過目測佢哋都NG咗10次以上，結果連道具電話都真係跌爛埋。為乜NG咁多次，事關蘭桂坊出名越夜越美麗，拍攝時周遭企滿唔少遊客同途人，有啲攞電話影相，有啲又高談闊論，亦因為有唔少人認得梁烈唯，喺佢放break時捉實佢影相，遲咗埋位，結果同一鏡頭，咪拍咗超過半個鐘先收到科。

上次梁烈唯拍《飛虎極戰》，一場撞車戲結果戲假成真，今次拍醉酒戲前，記者見佢喺車上先自隊兩罐啤酒，搞到面紅紅咁樣樣，似乎係想令自己快啲入戲咁。

對於飲酒拍戲，梁烈唯事後回覆傳媒話：「劇組開頭話幫我化面紅妝，不過如果咁化，會好假好核突，所以我麻麻地鍾意化妝。而我本身係飲一、兩啖酒就會面紅嘅人，所以先飲吓酒令塊面變紅，睇落會自然順眼啲。」

問到隻腳好番未，梁烈唯就話差不多完全復原，只係有條筋仲有少少扯住。「已經可以跑番步，醫生仲話想快啲好，千祈唔好唔郁。」