由韓國男星孔劉、金高恩、李棟旭等人主演嘅tvN劇集《鬼怪》，於上周五首播後就有好成績，情節緊湊得嚟又搞笑，令劇迷都好期待第3集嘅播出，所以劇組今日就率先公開劇照，不過就係李棟旭及劉仁娜初遇嘅場面。

劇照中，飾演陰間使者嘅李棟旭同劉仁娜喺天橋偶遇，係劇中兩人第一次見面，不過失憶嘅李棟旭就突然對住劉仁娜喊，令劉仁娜覺得好奇怪，但其實就連李棟旭自己都唔知點解會喊，唔通劉仁娜同李棟旭嘅失憶係有關？

而劇組就表示呢場戲係重要嘅戲份，所以拍攝期間李棟旭及劉仁娜都相當投入，務求一啲小細節都仔細交代到劇情，正式拍攝前亦經過多次綵排，令劇迷更加期待。