蕭生嘅燈神之力可謂無遠弗屆，就以前排結束嘅美國總統大選為例，蕭生多次預言共和黨特朗普會大敗，結果反而係特朗普入主白宮。唔單止咁，有網民曾經整理過蕭生嘅「神預言」，譬如港大學生會退聯失敗、本民前梁天琦喺新東補選得3,000票、仲有英國公投結果係留歐。
就喺上個月中，蕭生就預言林鄭表態唔選特首，梁振英就有機會入閘，蕭生嘅獨到見解係，林鄭唔參選係正正因為知道梁振英入到閘，其次林鄭覺得北京遲遲唔表態，佢亦冇時間備選。蕭生此言一出，網民當然叫好，但都只能夠靜觀事態發展。終於到咗噚日就有「神蹟」發生，梁振英突然以家庭為由宣佈不尋求連任，蕭生嘅功力真係冇得頂呀﹗
不過大家唔好掉以輕心，因為蕭生日前亦預言財政司司長曾俊華上馬，噚日佢回應自己係燈神之說時，仲話下屆特首將會係新民黨葉劉淑儀同曾俊華之爭，而結果將會係薯片叔叔當選……哇，蕭生咁講真係令網民腳都震埋，唔少網民都留言叫佢「預測」埋葉劉呀！
李八方
mailto:
[email protected]