周秀娜、黃芷晴、陳倩揚、菊梓喬同龐景峰今日到中環出席PAUL & JOE與香港群貓會舉辦彩妝新產品發佈會，宣揚領養貓隻做善事。

娜姐飼養咗一隻一歲多嘅愛貓「啵啵」，貓兒同佢特別有緣份，朋友第一次將小貓帶到娜姐屋企俾佢揀，隻貓瞓到唔捨得走，所以娜姐決定收養佢，o依家希望想養多一隻貓，等啵啵冇咁悶，娜姐指可能貓隻做咗絕育手術，冇咁活躍，亦少好多毛病，體重比正常貓輕，睇過醫生檢查身體系統冇問題，姑娘就同娜姐講，物似主人形，娜姐話：「我都覺得隻貓好似我，頭同面都好圓，個身得棚骨。」

娜姐以男友比喻貓，佢話：「貓就好似男人一樣，會有好sweet時候，畀適當空間大家，需要時候就會出現，好耐冇見隻貓佢會攬住我隻腳，我會摸吓佢錫吓佢。」娜姐坦言搵男朋友唔鍾意太黐身，最重要係體諒，如果要好多時間去陪伴對方相處，就未必會長久，娜姐自我覺得性格似貓，係醒目知道幾時先要出現，唔係越黐身又或花越多時間就代表越愛。

黃芷晴家中飼養咗兩隻狗、一隻貓、一隻兔仔，所有小動物都係爸爸媽媽飼養，仲爆養咗十年隻貓眼神好凌厲，屋企工人同朋友都話眼神好似華哥(黃日華)。今日係媽咪梁潔華正日生日，噚晚專登親手製作蛋糕，爸爸黃日華有份參與，整到尾聲時仲話要加裝飾。芷晴本想今天給媽咪一個驚喜，豈料爸爸昨晚踏入十二點已經急不及待送上蛋糕。