ViuTV《全民造星》圓滿結束，冠軍姜濤、亞軍陳卓賢（Ian）同季軍楊樂文（Lokman）以及落選嘅囝囝盧瀚霆（Anson Lo）、江熚生（Anson Kong）、王智德（Alton）、邱士縉（Stanley）同呂爵安（Edan）等12個囝囝，組成新男團MIRROR加入樂壇，由《造星》監製黃慧君（花姐）擔任經理人。

唔少人覺得《造星》肥仔梁業好正好有才華同表演天份，MIRROR唔預肥仔好冇道理，但原來ViuTV係另有安排，就係畀肥仔同何啟華（阿Dee）、吳保錡及身高193cm嘅郭嘉駿（193）組成另一隊新男團ERROR，喺娛樂圈殺出另一條路。單睇呢個陣容，大家就知佢哋呢個組合係玩騎呢。

噚晚ViuTV喺官網宣佈ERROR成立，仲播出一段發佈會嘅片段，話:「終於！呢四個偶像派搞掂晒準備工作！今日！呢一秒間！終於要進行佢哋首個出道發佈會！真係好多人都嚟撐佢哋呀...呀...」

片中肥仔、保錡、阿Dee同193着到去飲咁樣去發佈會，點知去到現場發現其實係MIRROR發佈會，個台佈景啲相全部係MIRROR，保錡、阿Dee同193見到忍唔住輪流爆粗，193話：「X！又話簽我哋返嚟做一哥？Budget呢？」阿Dee亦忍唔住爆粗：「X你個X吖！ViuTV個乞衣！」將古天樂早兩年生日醉咗講嗰句「ViuTV個乞衣」擺埋上枱。

跟住幾個見到個記者，上前打招呼，點知原來對方係馬經版記者，阿Dee就好開心咁笑住同記者握手話：「估唔到馬經都咁重視我哋。」幾個人仲話呢個係一個好開始㖭。肥仔、阿Dee佢哋逐一上台表演同自我介紹之後，擔任隊長嘅肥仔就指住台上MIRROR啲相話：「唔好以為淨係得呢班契弟有歌，我哋呢班契哥都有歌㗎。」結尾佢哋仲話4位實力偶像派，個個身懷秘技，又自封為騎呢cam爆男子組合，求大家多多支持。

呢段片至今日下午2點半為止有成5.2萬人觀看，而畀like嘅人有3000幾，比起MIRROR啲片幾百個like多好多倍，唔少網民喺fb洗晒版分享佢哋啲片㖭，分分鐘佢哋跑出快過MIRROR！

《蘋果》記者今日打畀ViuTV製作部副總裁金廣誠了解，佢話其實一早計劃分拆兩隊男團：「本來我哋想10幾個人喺MIRROR，花姐覺得呢個好嗰個又好，個個都想揀，所以最後我哋決定分成兩隊，ERROR個名係魯生（總經理魯庭暉）諗嘅，花姐做埋ERROR經理人，希望大家唔好話佢哋騎呢，佢哋係開心路線，一班好有理想嘅年青人。」原來ERROR現時身在日本，同花姐拍緊新節目《帶花姐去旅行》，15集節目預計農曆新年播出，至於今個月21號MIRROR喺九展舉行嘅演唱會，ERROR都會踩場，聽講會唱MIRROR新歌《一秒間》嘅惡搞版呢！

精選娛聞，喺晒《娛果》
http://fb.com/appledailyent