由蔡卓妍、周柏豪主演電影嘅《原諒他77次》上映一星期，票房截至今日已有760萬，佢哋今日就喺喺銅鑼灣舉行答謝宴，寄望電影衝破千萬，席上佢哋食豬腳雞腳，笑言話要為之後不斷謝票補定腳骨力，柏豪特登餵拍檔阿Sa。而鄭希怡(Yumiko)姍姍來遲，差不多活動完才到。

阿Sa同柏豪都有信心能衝破千萬，而明天大陸都會上映，撞正《變形金剛：終極戰士》（Transformers: The Last Knight）同日播，佢哋都話有信心，柏豪話:「噚日我哋係香港票房第一。」呢套戲老闆想開續集，阿Sa笑話要傾分紅。阿Sa話噚日宣傳，老闆不斷俾新樓盤資料俾自己，但自覺太貴難買，佢話:「係獨立屋，真係好靚，但9位數字，佢仲話（容）祖兒都吼實。」柏豪笑話叫佢問老闆拎折扣，57或59折，不過阿Sa單純聽唔明，仲要問點解。

另外，講到連詩雅同華納唱片嘅合約糾紛一事，柏豪聞言即不想多談，仲話指自己下星期都滿約，有傳蕭定一開唱片公司佢會加盟，佢話:「遲啲公佈。」另外，Yumiko贊成開續集，笑話到時搶阿Sa男友，因現實中唔會咁做。