【寸嘴抵賴】
記者巡查五個街巿，買蟹期間故意向蟹販詢問：「點解唔係拆咗繩先計淨重？」結果不是遭到反唇相稽「東風螺個殼夠重啦，我拆肉出嚟計淨重呀笨！」便是以不識行規為由換來一頓責罵。
記者走進大埔墟街巿，發現兩個不同銷售手法的海鮮檔，一個用藍色薄身尼龍繩綁蟹，每斤售價為128元，另外一檔用厚重紅色尼龍繩綁住蟹身，每斤售價僅為88元，後者明顯呃秤，當記者嘗試游說檔主拆走尼龍繩量重時，遭商販一輪白眼後理直氣理壯回應：「買蟹邊有剪咗先磅呀，細草賣110至120（一斤），大草賣88（一斤），貨主計數仲叻過你啦！」暗示大水草綁蟹的呃秤銷售手法早已是人所共知的行規。反而記者詢問另一名蟹價較貴的檔主，對方善意提醒：「粗繩畀你110蚊一斤都冇用，條繩都成斤重，我哋特登番嚟除咗條繩綁番呢啲（幼）繩上去。好過人哋成條繩咁粗。」