發短訊，免去把肉麻或道歉說話宣之於口的尷尬。新年期間，更是大派用場，慵懶一族可以用短訊代替上門拜年，食腦一族可以發揮創意與幽默感，貪玩一族可以整蠱人。
與朋友聚會，發現近來有個短訊流傳甚廣。Hit得起自然有其道理，短訊內容別具心裁，富幽默感，兼且層次分明，一擔砂糖一擔屎──未讀到最後兩句都會睇得好開心，然後心情急轉直下：「聽講有三條友周圍搵你，重話搵到你就會纏住你唔放！佢哋一個叫財神，一個叫順利，帶頭那位叫幸福！我問過煩惱，佢根本唔愛你！重有健康託我帶封情信畀你，佢暗戀咗你好耐！你要將短訊發給8個好友，如果唔發，你今年就會破財。發吧！我都是被逼㗎！」
流行的最大功臣，原來是那句詛咒。從不發短訊的A在初三收到凶咒，即時大動肝火，然而，他按捺着，當務之急是解除凶咒，他即時將短訊轉發他人，然後才致發訊人大興問罪，對方說跟你開玩笑而已，A更怒：「同你好熟呀！」就這樣反了臉。

香港人迷信，新年流流被詛咒破財豈可掉以輕心？一傳八，八傳六十四，六十四傳五百一十二……生生不息，齊齊搵替死鬼。B嘆道：「我轉發畀八個朋友，有五個寄返轉頭，即係我要再發多四十次，一蚊發一個，唔慌唔破財啦！」真是天理循環，報應不爽。己所不欲，勿施於人，C深明此道理，因此在轉發前先將咒語刪除。講到最高興的，當然是電訊公司，八蚊又八蚊，八蚊又八蚊，你都咪話唔盞鬼。