【英超】夏神唔收MOTM 讓畀韋利安
車路士夏薩特哈特斯菲爾德韋利安
車路士周二英超作客3:1輕取哈特斯菲爾德,夏薩特雖然冇波入,但仍獲賽會頒發今場最佳球員獎項。不過,佢就好識做,拎完獎後將佢交番畀今場貢獻一射兩傳嘅韋利安,認為呢位巴西人比自己更值得攞獎。
夏神同韋利安賽後一齊接受訪問,兩人喺鏡頭前老友鬼鬼,發表贏波感受。之後,記者就將最佳球員獎交畀韋利安,叫佢將呢個獎獻畀夏薩特,點知後者就話:「唔好,唔好!朋友,呢個獎係你嘅,你先至值得。」韋利安一開始都唔肯收,但當然之後亦冇再推唐。
韋利安呢場波表現優異,先助攻泰莫爾巴卡約高開紀錄,之後完半場前接應馬高斯阿朗素傳中頂成2:0;換邊後又鋪橋搭路傳交柏度洛迪古斯射入,三個入球都關佢事。另外,干地上任後,韋利安一直唔係必然正選,但佢亦話畀記者聽,自己冇諗過會離開,反而會努力留隊爭正選。
----------
球迷一定要知!英超一哥曼城,已經登陸『BFB』!登入即送藍月球星: http://bit.ly/2AAiPDS