交易所買賣基金（ETF）睇落好似好簡單，但港交所（388）下個月特登搞個「ETF大學」，畀經紀同銀行客戶經理參加。
其實以前港交所一直有搞關於ETF嘅教育活動，座落會展畀公眾入場參加，但今次就專門畀業界人士，重點係畀經紀聽書。唔知係咪想train好業界幫手sell ETF呢？抑或經紀好期待嘅基金分銷平台，即將面世，打破銀行賣基金嘅壟斷，等券商可以分一杯羹？
呢個6月6至7日，一連兩日收市後嘅課程，請咗港交所ETF主管Brian Roberts、恒指公司代表之外，仲搵到標普道瓊斯指數、領航呢類大fund house代表幫手講書。
另外仲有來自華夏基金（香港）、BMO、三星資產運用（香港）、南方東英嘅講者。呢個「ETF大學」以後每季都會搞，聽完書，咪當業界聯誼囉。