每年農曆新年,運輸署都會攞一批特別靚嘅幸運車牌出嚟拍賣,牛年拍賣會喺2月7號舉行。舊年農曆年拍賣成績好好,共賣到3,000幾萬元,其中無字頭18更以1,600幾萬元成交,破晒紀錄。
市場人士估計今年拍賣應該冇咁好景,118專業幸運車牌公司負責人陳明才指,金融海嘯同埋近排股市波動,對成交價都有一定影響,而且今年啲幸運車牌特別程度比對上一年似乎弱咗少少,吸引力較遜色。佢最睇好發字車牌,3218同1318寓意生意實發同一生實發,估計成交價最少30萬元。自訂車牌EEEE同TTT,排列整齊得意,成交價可能高達20萬元。