日本大地震大海嘯，令2000年開幕嘅福島Aquamarina水族館停電，館入面數以萬計嘅海洋動物慘死。呢個水族館同香港海洋公園係姊妹館，海洋公園水族館館長黎耀南噚日話，打算稍後送20條魚去福島水族館，包括蘇眉、鯊魚、鯆魚同龍躉，支持該館重開。

福島核危機未過，港府仍發出黑色旅警，海洋公園貿貿然送啲珍貴海產去，八方聽到有啲唔忍心，何必要啲魚做另類死士呢？海洋公園唔係咁冇愛心，近年嚟積極繁殖25種海洋生物，半年前成功培育第二代嘅黑點土鯆出世，屬於魔鬼魚嘅一種，計埋兩年前培育嘅第二代，海洋奇觀入面有大約20條第二代黑點土鯆。
黎耀南話培養第二代一啲都唔簡單，除咗要父母健康、有良好嘅水質同環境，最重要都係兩條魚肯交配。不過生咗出嚟又怕畀其他鯊魚食，所以海洋公園有個魚仔育嬰室，將未孵嘅卵同啱啱出世嘅魚隔離。最近鸚鵡螺啱啱產卵，成功繁殖第一代，不過要等多九個月先知有冇受精。