何佩瑜(Jeana)去年4月喺台灣拍電影《天使曾經來過》，拍潛水戲險死(新聞連結： http://bit.ly/2GtPxb6 )、喺台灣又不幸遇上交通意外，坐於司機位旁嘅Jeana撞及頭、眼及鼻，多次徘徊鬼門關，本來件事都過咗差唔多成年，未知係唔係電影《天使曾經來過》就嚟上映，Jeana又無啦啦心血來潮諗起呢件往事，仲記錯時間喺冬天拍攝。

Jeana凌晨喺IG貼出上年嘅開工相，新片就嚟喺馬來西亞上映，不過有工作在身，要喺香港開工，唔可以親身過去宣傳，佢指喺戲中演「雪」呢個角色比較複雜，要應付一啲潛水戲，仲要喺海底拍攝，佢都提早一月去墾丁訓練，由於正式拍攝時，喺大浪紅色警報同天氣寒涼嘅狀況下，出現嘔吐同抽筋，又出現水母不停咁刺痛皮膚，種種因素對閉氣喺海底拍攝並唔容易，因此每一次水中8米閉氣，Jeana都要盡量保持多啲秒數，等導演盡量拍多啲鏡頭，所以每次快冇氧氣嗰陣先衝上水面，近40次拍攝都徘徊喺幾秒接近窒息之間，每次衝出水面吸第一啖空氣都好用力。

之但係Jeana遺憾係有一次達唔到導演要求，導演希望佢用氧氣瓶吸氧氣潛到10米深海底，吸飽後拿開氧氣喉，喺10米深處演戲，唔夠氣再吸，反覆去做，拍完先上水面，當時Jeana冇戴潛水鏡，於10米深嘅海底睇唔清楚嘢，毫無安全感，喺海底不停來回運用氧氣喉，對於潛水新手Jeana嚟講，嘴同鼻都有機會進水，Jeana仍鼓起勇氣試一次，結果去到10米深，Jeana忽然覺得自己呼吸未能協調，掙扎起上嚟，想馬上衝上水面，教練立刻阻止Jeana，因為吸住氧氣潛水係唔可以即刻衝上水面，氣壓問題會爆肺，甚至死亡，最後Jeana被慢慢帶上水面，頭一伸出海面，Jeana即忍唔住大叫同喊，Jeana覺得「自問是一個勇於冒險及嘗試的人，卻第一次感受到自己與死亡那麼接近」。