王征亂港,搞到大家心情都down晒,幸好復活節假快到,有啲朋友都會去旅行開心吓。
噚日同國泰航空高層傾偈,知道佢哋年底會推自選點餐服務,例如經濟艙乘客都可以「越級」點餐。𠵱家乘客已經可以登機前選擇飛機餐(圖)要食素、食海鮮或者唔食豬肉之類,但都只限於同一機艙等級,將來就可以升級,例如經濟艙乘客網上check-in時,可以喺商務飛機餐menu訂餐,當然要另外畀錢啦。價錢等國泰話暫未有詳情。
有得揀先至係老闆,經濟艙座位餐枱咁細,商務艙餐份量比較大,擺唔擺得落㗎。同事阿敏就發揮港女精神,「唓!我不如瘋狂點杯麵,又唔使錢」。
講開又講,剛過去嘅七人欖球賽,國泰空姐都有份拍廣告,吸引唔少毒男、宅男share。不過,絲打質疑國泰唔搵空少、男機師拍吓廣告。