熱刺訪港招風雨，今日撞正紅雨甚至黑雨都要出席活動，雖然總算順利完成，但唔知睇完呢張相，會唔會好羨慕呢？4位熱刺球員孫興民、奇雲雲馬、賓戴維斯同基爾獲加呢兩日先應球會贊助商邀請到南韓出席活動，今日佢哋就去到首爾培花女子高校出席記者會，搞到在場過百位女生瘋狂尖叫，其中最具吸引力當然係東道主孫興民啦，4位熱刺兵仲同幾位上台女生一齊整壽司，難怪少女們畀晒心心！之後佢哋就做番老本行，教30位小球員踢波。

喺活動上唔知有心定無意，問題好多都畀晒民仔嘅隊友講吓佢哋點睇呢位南韓國2，基爾獲加話：「民仔成日面露笑容，又唱晒歌跳晒舞，好有力量，但佢喺場上相當謙虛學習同勤力，係一個好特別嘅球員。」出名同民仔最friend嘅奇雲雲馬就話：「民仔係我嘅最好朋友，我希望同佢繼續效力球隊一段長時間。」