賴志文指,人行使用和稀泥政策機會較高,「人行舊年一嘢調低中間價、單日貶值2%嚇親市場,今次轉陣,有秩序咁逐啲跌」。意味人行會動用外儲「部份干預」,但他認為策略難成功,因為雪球效應將會出現。
他認為,歷來沒有一個經濟體能夠促成「有秩序貶值」,「呢個世界只係得兩種情況,一係freefall(快速滑落),好似當年巴西、阿根廷咁貶得好勁;一係好似香港,用聯滙撐住」。他分析,雪球效應有機會使人民幣今年加快貶值,未到年底見7.5元,「你想人幣有序貶值?但市場唔會配合你,佢知你貶值就開始沽,𠵱家啲阿公阿婆,牛頭角順嫂都話要沽,人幣定存到期即刻走」。截至上周五,人幣在岸價今年貶值近1.5%至每美元兌6.5938元人幣,仍有12%即到7.5元目標價。
市場認為經濟下行,人幣沽售壓力需要釋放,無可避免要下跌。賴志文不以為然,指人幣升值周期逆轉才是關鍵,「由2005年匯改開始,人幣升值接近10年,美國聯儲局喺呢段時間實行量化寬鬆,資金一窩蜂入去中國市場,亦令人行資產負債表膨脹,中國GDP自然會上升」。他指,以前不少投資者借入美元,買入人幣計價資產的「長倉」,「不過,𠵱家美國加息周期開始,所有嘢又調返轉頭」。