袁文傑、周家蔚、葉家寶等噚晚喺長沙灣出席「大馬士革的呼聲」專題紀錄片分享會，早前袁文傑拍處境劇《愛．回家之開心速遞》發生小意外，佢唔小心跌親仲將滕麗名拋咗出去，結果搞到自己膝頭受傷，阿滕就整親脊椎，阿滕日前喺fb貼咗針灸頭部穴位嘅相，目測至少有50支針篤喺佢頭頂、眉頭、臉頰同鰓位等唔同位置！(新聞連結： http://bit.ly/2yjD5W1 )

講到o依家情況，袁文傑話：「阿滕做緊針灸，希望佢快啲康復。大家都有手尾跟，我隻右腳都未好番晒，要睇多兩個禮拜醫生，可能要做微創手術，o依家跑步都赤赤痛，所以我都希望可以快啲醫番好，唔想影響工作。」

葉家寶本身係仁美清叙顧問，對於日前黎燕珊辭去榮譽主席一職，外界估係因為黎燕珊簽咗無綫，為免身份尷尬，所以請辭，葉家寶回應話：「阿珊有自己工作，又成日唔喺香港，可能都覺得係時候交棒。仁美係獨立組織，希望大家體諒係慈善，而阿珊係第一屆亞姐冠軍，好有代表性。」

同場嘅周家蔚就話老公洪天明正喺馬來西亞開會，天明因為太掛住屋企，視像嗰陣忍唔住喊咗出嚟，同兩個仔鬥喊。佢又講到囝囝好叻玩facetime：「佢哋自己會打電話畀爺爺(洪金寶)，爺爺梗係話好。」另外，洪金寶之前做咗腳手術，暫時要坐輪椅，早前被發現坐輪椅去街市買餸，家蔚笑話老爺坐唔定，遺傳咗俾天明。