美籍華裔歌手劉晨芝最近榮升韓式料理老闆，佢同文凱玲等幾個股東，合資約五百萬，喺中環開咗間韓式料理。噚日開幕，晚上仲有party搞，出席者有傅明憲、王晶兩父女及胡杏兒男友Phil。近日有周刊影到Phil摸「翻版栢芝」陶枳樽手臂，即成新聞人物。

噚晚Phil甫到場，影完相，即俾傳媒「包圍」，Phil即匆匆入場，不欲受訪。劉晨芝為佢解圍：「佢係我契哥，今日嚟捧我場，佢唔係圈中人。」

同場另一焦點人物，就係回復單身嘅傅明憲，佢同兩個圈外好友合照，其中一個係應昌佑家姐。傅明憲話:「大家都知我好少出席公開場合，今（昨）晚係嚟捧劉晨芝場。」問佢0依家心情平伏番未？傅明憲謂:「0依家好忙，因為要考潛水長，如火如荼，考到七七八八再考潛水教練。」佢又話噚日同教練教小朋友潛水初體驗，因為佢着背心短褲，曬到黑晒。

都係講番感情生活。傅明憲話對追求者嘅要求，首要條件係支持愛護動物協會。咁潛水遇唔到追求者嗎？佢笑笑口話:「有啲海龜，間中有海星等吓我。」

是否未ready？傅明憲謂:「之前已經講過0架喇，多講唔好，但為咗畀你哋可以交差，總之過去就過去咗，希望佢生活開開心心，我就開始我新生活。我目標就係多年前嘅心願：潛水。」

問傅明憲自從同莊家彬分手後仲有冇聯絡？佢話:「前兩日佢生日，我有WhatsApp佢生日快樂。由始至終我都祝福佢。」那莊家彬點覆？傅明憲表示:「唔多講，但我真心祝福佢。」又表示已經回復心情了。