噚日「發霉」國企又再郁過，東北電氣（042）及成都普天電纜（1202）分別升了15%，交大科技（300）升19%，南京熊貓（553）升10%。以上冷門國企之中，得成都普天無A股，其他嘅國內A股，都貴過H股好多，其中又以東北電同埋熊貓折讓最大，前者A股造2.79元人民幣，H股折讓67%，後者A股造5.74元人民幣，H股折讓64%。
不過，要留意嘅係東北電A股係ST股，即係連年虧損後，再蝕嘅話有機會除牌嘅公司，之但係熊貓係正式A股，故此折讓幅度較有參考價值。市場仲有一隻折讓特大嘅國企叫洛陽玻璃（1108），因母公司與子公司錢銀問題，股份停牌好耐仲未復牌。

其實熊貓同母公司熊貓集團都有錢銀問題，母公司一度佔用子公司資金逾2億元，但已逐步「褪」回子公司，包括上月再償還1375萬元人民幣（下同），令未償還款項降至3160萬元，母公司另將以2幅土地抵償3160萬元債務，只要該以資抵債方案，於今年12月31日的臨時股東大會獲通過，母公司便全數還清欠款。
熊貓去年賺9276萬元，今年首3季賺6810萬元，主要係同愛立信合營公司北京索愛普天及南京愛立信熊貓通信，改組後盈利貢獻大增，論基本質素，較其他冷門國企股有保證，也有3G念可炒，博呢隻以1.85元止蝕。
歐陽風