當年今日
關於我們

【李八方online】爬樹播國歌 龍心大鬧《城壇》

蘋果日報 2019/12/22 15:45

龍心城市論壇國歌港台林克霖李八方ONLINE蘇敬恆Black Bloc

今日係冬至,亦係擔任港台節目《城市論壇》主持嘅蘇敬恆(蘇B)第200次主持城壇,所以蘇B趁住佳節同嘉賓、觀眾食湯圓慶祝,派出200粒黑白湯圓,同大家開心share,不過就遇到綽號「龍心」嘅網絡紅人林克霖贈興,喺場外大播國歌,仲一度爬上大台後嘅大樹,危站樹幹,搞到現場直播緊嘅論壇都要一度暫停討論。
冬至加上臨近聖誕,喺九龍城賈炳達道公園舉行嘅《城市論壇》現場都加咗裝飾,好有節日氣氛,蘇B都戴咗條紅色頸巾應節。喺節目正式開始前,先搞個湯圓宴,嘉賓之一嘅香港眾志周庭話,冬至最緊要團圓、平安,希望大家開開心心,又話香港人已經俾娥特搞到好團結,希望娥特可以認真聽聽民意,但有獲派兩粒湯圓嘅台下觀眾話市民要求五大訴求,兩粒湯圓唔夠皮,蘇B就叫大家隨便添食。
之後論壇順利展開,點知討論至一半,場外突然響起國歌等歌曲,原來係一身Black Bloc嘅龍心用私家擴音器播歌,佢仲爬上樹躲避工作人員嘅勸阻。最初蘇B都冇符,惟有叫嘉賓講嘢大聲啲,點知龍心行上一條比較幼嘅樹幹,幾乎行到講台上嘉賓頭上,話要發言,迫到蘇B要叫停討論,不斷叫龍心落返嚟。面對龍心發言要求,蘇B邊講「得、得、得」,邊請工作人員請佢坐低飲啖水,最後擾釀咗幾分鐘,嘉賓總算可以繼續發言總結。果然主持咗200次城壇,蘇B嘅應變能力係有番咁上下,令城壇可以喺冬至日完滿結束。
-----------------------------
【匿名港警爆大鑊】
韓國KBS時事節目《時事直擊:香港 被自殺》
一按即睇
-----------------------------
無懼警暴 學懂自救
《抗暴之戰●法例須知》讀果 上架
-----------------------------
【撐學生】
召集有心人 撐學生全年睇《蘋果》
立即按此
empty
原圖由梁穎妍攝