滙控（005）昨日復牌，最低見過45.90元，收市報46.25元，大跌18.7%，估計後市仲未跌完。至於供股與否，沽正股買「威士」又好，散戶宜各自衡量，冇話一定要為供股而供。
銀行股一片哀鴻，另一隻中銀香港（2388）亦跌得幾慘，下挫5.7%，收報7.17元。渣打（2888）跌5.2%，收67.75元，但收市後公佈全年業績，純利錄得17%增長，達33億美元，受惠成績表亮麗，估計今日可以反彈。
H指跑贏大市，個別股份低位有買盤吸納，其中廣州廣船（317）低開之後，一度跌至7.44元，但低位有支持，收市報8.04元，僅跌0.07元，股價雖未能倒升，但已收復不少失地。

定單排至2012年

廣船剛獲當局高新技術企業認定，於08年至2010年可按15%稅率繳交企業所得稅，比之前25%慳唔少。另外，集團去年造船噸位達71萬噸，交付18艘萬噸級輪船，創新高紀錄，現時生產定單已安排至2012年。
方星俠