商舖交投旺,趁勢放售個案增加,市場人士話,協和集團正在暗標出售荃灣海天豪苑樓下商場協和廣場,樓面十六萬呎,市值五億。
英皇集團較早時亦都標售鄰近英皇娛樂廣場,叫價七億,聞說有基金同資深投資者傾緊,最高價六億以上,睇嚟投資者幾睇好荃灣舖市。
蘭西向協和集團打聽,負責人否認招標,只承認暫停租務,正在研究新招租方案。不過,坊間已有人收到入標邀請。
有人認為,該盤標售亦有一定難度,因為部份地舖業權分散,發展商當初發展物業時,同地盤小業主協議,將部份住宅及舖位作為賠償,海天豪苑落成後,最值錢部份街舖就即時被瓜分,發展商不能享有商場完整業權。
江湖重現一口價
早一兩年,樓市氣氛較差,蘭西記得,發展商諗咗「一口價」賣樓招數,推出一批單位,以劃一優惠價發售。時至今日,賣樓又再重施故技,華懋馬鞍山迎濤灣,即日推出八個十二樓以下海景單位,劃一價三百三十八萬八,每呎由三千一百幾至三千五百幾,聽講話,比起六月份已經減咗價,優惠期到八月一號。
另外重搭埋其他優惠,包括面對換樓客嘅九十天成交期,而呢八個單位嘅買家,美聯每位都送價值一萬八千八嘅家具禮券。