恐怖小說大師史提芬京（Stephen King）1986出版著作再次搬上大銀幕，新片《小丑回魂》（It）周五喺北美開畫後大收旺場，開畫首日錄得約5,100萬美元（近4億港元）票房收入，成為票房冠軍，超越R級（限制級）電影《死侍：不死現身》（Deadpool）創下嘅首日4,730萬美元（近3.7億港元），周日嘅累積票房已錄得1.23億美元（約9.5億港元），全球更勁收達1.9億美元（逾14億港元）。

香港方面，《小丑回魂》創下史提芬京小說改編電影喺香港最高開畫周末票房紀錄，昨日仍佔本地票房榜冠軍。由導演Andrés Muschietti重新翻拍嘅《小丑回魂》，於權威影評網站Rotten Tomatoes獲得87%新鮮好評，獲驚慄迷紛紛讚好，而片中飾演小丑嘅男星Bill Skarsgard原來落妝後一啲都唔嚇人，相反更被讚係個瑞典型男。

Bill Skarsgard隱藏於濃厚小丑妝底下，竟然係個擁有Model身形嘅27歲型男，佢呢個小丑妝每次足足花兩個半小時進行，不過Bill完全唔介意冇以真樣示人，仲表示：「我私下是個內向的人，所以就算完全沒被認出也不在意，可以隱藏在濃妝之下還不錯。」Bill入行多年，先後參演唔少影視作品，大多偏向恐怖驚悚，佢亦有演出早前上映嘅《原子殺姬》（Atomic Blonde）。