早排話要賣走Magnum(2080)嘅葉茂林,繼續錫住耀才證券(1428)呢隻金蛋。因為舊年生意好,公司噚晚又發盈喜,預計截至今年一月底止十個月純利,已經多過上年度全年,所以向大約三百名員工派發接近一千四百萬元花紅,而且上個月已經加薪,平均加幅12%,個別員工更獲加薪兩成,實行過肥年。
派錢之餘,耀才老闆葉茂林日前亦跟全部管理層同員工喺銅鑼灣某酒樓舉行周年晚宴,呢晚仲玩「扮嘢王大賽」,有人拎住個港交所(388)行政總裁李小加同阿里巴巴創辦人馬雲嘅面具,就話係扮佢兩位,不過葉茂林就好like 呢個idea,即場問同事借來面具影相留念。
查實葉茂林一直都好支持李小加,小加推港股加時、夜期等等,佢全部贊成,小加力推嘅滬港通,舊年開通之後,又令耀才吸到十倍內地新客戶,難怪葉茂林見到小加面具都咁開心。