繼《閣樓》話影到俄羅斯「美少女」古妮高娃裸照之後,我求大俠最近又睇到單關於佢嘅「筍嘢」。據《新浪網》引述俄羅斯專業新聞媒體《新聞在綫》講,古妮高娃喺一部叫做《如果只有網球》嘅科幻片擔正,戲中重有大膽露點演出。
話說片中描述地球喺世界大戰後,只剩番幾條村,又唔夠糧食,只有贏咗網球賽先得到食物。咁代表佢條村參賽嘅古妮高娃,喺賽前雖然發現戰衣被偷,但為咗村民有嘢食,一於半裸打波喎!咁嘅劇情實在荒謬之極,古妮高娃會唔會拍呢啲劇情近乎三級片嘅戲呀?另外,古妮高娃已經向《閣樓》採取法律行動,咁唔知佢會唔會告埋《新聞在綫》誹謗呢?
兵工廠功臣愛伸脷
前日阿仙奴作客以二比○贏咗保頓之後,幾乎穩奪英超聯冠軍。場波嘅兩大入波功臣龍格保同埋韋托特,都好鍾意伸條脷出嚟。當然男人老狗咁做,其實有啲那個,不過𠵱家阿仙奴個勢咁好,球員興奮啲都不為過啫。
艾芬保煞科戰獲解凍
艾芬保早排話德國啲人懶,淨係識得攞公援,搞到俾拜仁雪咗兩場,但喺禮拜六嘅德甲聯煞科日佢獲解凍,可以踢對羅斯托克場波。事關嗰場波關乎拜仁攞唔攞到聯賽冠軍,點都要有個好似艾芬保咁有卡士嘅球員壓陣啩!