【新增內容】

王馨平（Linda）今早喺社交網貼坐輪椅相，留言：「只需一秒的時間，意外就會發生！」相中嘅佢左腳小腿貼咗塊紗布，對着鏡頭露出苦笑，網民紛紛留言慰問，關心佢點解會受傷。

《蘋果》致電Linda了解，佢喺電話自嘲：「我蠢呀！我哋去馬爾代夫玩，噚晚坐機返香港，但噚日馬爾代夫全日大雨，我要坐船去機場，點知我叉錯腳跌咗落海，但o依家你問番我，我都唔知點解會發生，我明明一隻腳已經上咗船，另一隻腳唔知點解會踏空，可能好大雨又好黑，就跌咗落海，之後即刻浮番上嚟，但個頭同船底碰撞咗一下，好彩唔係好大力，o依家諗番嗰一刻好危險，分分鐘會暈！」Linda笑笑話：「唔係好大件事，隻腳撞瘀啫，不過航空公司一定要我坐輪椅，因為見到我有流血。」

Linda之後再補充，原來呢次意外係上遊艇準備去機場時出事，當時船上面同喺碼頭嘅人，都跳落水救人，Linda笑笑話：「我都有問老公，點解你唔即刻跳落水嘅？佢話大家都手忙腳亂，佢見到已經有人跳落水，見到我已經浮上岸，諗住拉我上岸，所以冇跳落水。」問到有冇嬲老公呢？Linida表示：「冇呀，我講笑啫，如果我老公跌落水仲大鑊，我比較鎮定啲，我都好嬲自己咁渣，邊有人跌落海，自己都喺度唱《有隻雀仔跌落水》。當時酒店總經理送我哋上船，全部都亂晒籠，嚇死佢哋，好在我識游水，自己游番上碼頭，都同佢哋講笑，叫佢哋唔使擔心，冇事。」

問到傷勢情況，Linda輕鬆表示：「酒店即刻叫佢哋嘅醫生嚟，其實真係冇乜嘢，只係流咗好多血，不過唔係刮到見骨嗰啲，應該只係表皮啫，會瘀幾日，醫生叫我返香港最好去換藥，希望唔會有感染。個頭就冇事，只係好輕微碰一碰，即刻喺船底游番出去，我覺得自己都幾鎮定，哈哈哈！成件事覺得好好笑，真係冇諗過發生啲咁嘅嘢，去過咁多次馬爾代夫，上船落船從來都未試過咁，覺得意外唔係小心就得，意外就係意外，下一秒鐘我就跌咗落水，所有人都好愕然。」

噚晚搭飛機嘅Linda，因為天氣問題，航班延遲至今早11點幾才抵港，身為瑜伽導師嘅佢，因為中午有瑜伽班要教，甫落機即負傷教瑜伽：「我中午有瑜伽課，成班人等緊，我都唔願意臨時取消，所以直接由機場趕去教課，唔想失場。」

更多娛聞，喺晒《娛果》
http://fb.com/appledailyent