貝力斯同沈拿嘅公司騎師牌照，俱於下月29日賽事後便屆滿，其中沈拿已贏出七場頭馬，原本續牌冇難度，但上期策「與龍共舞」，姍姍來遲只得第五名，被指直路嘅跑法有疑點，需要押後研訊，令佢續牌忽然添上變數。

至於22歲的貝力斯就苦戰兩個半月，暫時只得「明月昇輝」、「發財先生」兩場頭馬，而佢今季開齋馬「明月昇輝」據知已冇得再騎。

韋達馬房「明月昇輝」開鑼日由貝力斯贏出五班田草1200米後，跟住兩場貝力斯均連續搏失，一次屈居亞軍，上仗則外檔走位一般下衝近只得第7名。呢匹韋廐馬已報名本星期六(23日)五班1400米，增程角逐，已book定改配法國好手巴度，亦似乎貝力斯同韋達暫時停止合作，騎者要續牌，嚟緊呢個半月真係要付出200%努力！