呢位近年身材略脹嘅球星，透露自己鍾意嘅食物頭3位，分別係炸薯條、焗意粉同Pizza，都好肥膩啫，咁大家知點解佢開始發福喇！最鍾意嘅10種味道入邊，汽油味竟然排第4，似乎唔多健康喎！
講番足球場，呢位10號仔仲話最鍾意同碧咸合作，咁將來會唔會去洛杉磯銀河隊呢？反而祖記名宿柏天尼同巴治奧榜上無名，睇嚟佢同巴治奧當年嘅瑜亮之爭好殘酷。至於射罰球秘訣，佢分別提到要夠力、最好有4至5米助跑就最好，各位後生仔得閒可以自己試吓。
講番祖記，佢哋啱啱喺聯賽靠摩德納球員擺烏龍，以1:0擊敗對手，仲以兩分壓倒拿玻里重返榜首，連運氣都有埋，相信來季升上意甲冇咩難度，廸比亞路出年意甲見喇！