去屆港姐亞軍蔡思貝，早前被爆同大隻仔麥秋成拍拖，仍緋聞不絕，日前拍新劇已有傳姣電羅仲謙，約羅仲謙食消夜，今日又有雜誌爆料，指佢上月出埠去完台灣拍外景，又發姣功冧掂「大孖」周志文。

據報道指，蔡思貝喺台中拍外景嗰陣，蔡思貝見「名草有主」嘅羅仲謙後，就轉攻大孖，當晚兩人飲咗好多酒，有傳蔡思貝直接上咗對方酒店房過夜，第二朝先返自己房換衫開工。

報道又表示，返港後，蔡思貝同大孖相約去撐枱腳，當晚被周刊影到佢哋先上錄音室探吳若希，再一齊去九龍城開餐。

約凌晨1點，吳若希先同友人揸車離開，留番大孖同蔡思貝二人世界，不時大聲講大聲笑，蔡思貝喺馬路中心主動拖大孖嘅手仔，之後去二人去食糖水，旁若無人，公然痴纏咁互餵糖水，不過離開糖水店後，蔡思貝忽然黑面發脾氣，撇低大孖，上咗一部的士走人。

另外，據雜誌報道，原來大孖已經同女友CoCo分咗手，CoCo仲轉冧向華強之子向佐，而大孖則同蔡思貝撻着。