唔少企業透過資助旅遊，獎勵工作有好表現嘅員工，政府嘅「長期優良服務公費旅行獎勵計劃」都係類似獎勵公務員嘅計劃。2018年《施政報告》公佈，有關計劃會放寬限制，獲獎勵嘅公僕原本只能與配偶同行嘅限制，會放寬至容許彈性選擇一名同行人士，領取相同嘅旅行津貼。咁到底2019/20年度計劃嘅2,516個獎勵名額中，邊個部門受惠者最多？

兩人同遊獲資助約5.2萬

根據計劃，旅行津貼額為每位26,140元，兩人同遊即係獲資助約5.2萬，政府預算開支約為1.31億元。公務員事務局回應話，呢個獎勵配額係根據各政策局或部門符合連續服務20年資格的合資格人數，按每27名人員給予一個配額。由於係有比例咁分配名額，結果唔令人意外，獲配額最多嘅係一般職系處，配額達489個，其次就係有3萬編制嘅警務處，配額有477個，即係攞到2,480萬；消防處配額則第三高，達130個；房屋署緊隨其後有113個，而醫療輔助隊、公司註冊處、創新科技署、知識產權署、土地註冊處同破產管理署六個部門，配額各有一個，係所有部門中最少。