喺建制派或者阿爺眼中，外部勢力似乎站喺泛民一邊，以為外國人會以人權、自由、西方普世價值為藉口，為泛民打氣加油鳴鑼開道，難怪港澳辦主任王光亞認定泛民同外國勢力「勾搭」。但其實今次政改，唔少泛民認為，呢班經常被以為是泛民同路人嘅外國勢力或外國駐港總領事，其實站喺建制派一邊，明言暗語要求泛民袋住先。
有政界中人話呀，過去多位立法會議員同外國領事會面時，領事們都會詢問議員點睇政改，有人話佢哋席間嘅提問已經反映佢哋想法、甚至如實叫議員支持，相信因為喺呢班領事眼中，以為「一人一票」就係普選、就係進步，唔明白選民基礎只有20幾萬、由中央同權貴掌控的提名委員會，攞住過半數提名門檻，可以有幾邪惡。

領事遇正經事食花生

好似經常被點名嘅英美勢力，大家不妨回顧，英、美駐港總領事喺整個政改或雨傘運動中，有冇任何公開發言令泛民支持者興奮？其實兩個人嘅「曝光率」最高係喺新年期間嘅賀詞，用廣東話「麻醉」港人，講聲恭喜發財，令港人以為佢哋同聲同氣，但一到正經大事，大家留意吓，英、美領事有冇公開呼籲中央政府修改8.31決定、增加提委會民主成份，定係同花生友一齊食花生？部份泛民對呢班外國勢力死心，或者根本當佢哋不存在，有啲人甚至喺同領事嘅會面中提早離場，因為實在話不投機半句多；觀乎民主之父李柱銘早前到英國國會作證時，喺國會會議批評吳若蘭對白皮書一役唔出聲：「英國外交部不出聲，你們的總領事（吳若蘭）不出聲，這真是令人擔心」，可見英美勢力，未必一定同泛民同聲同氣。
花生友