近日大陸政府出辣招整治娛樂圈天價片酬嘅演員，三大網絡平台同多間影視公司紛紛表態支持，同時稅務局除了大查逃稅嘅公司同演員外，又將稅項由最高交10%變成42%，依家除咗范冰冰因陰陽合同已被軟禁受查外，有指下一個受查女星係楊冪，話佢拍一齣劇攞成億酬勞，傳聞拍《三生三世十里桃花》就收呢個價，喺傳得咁厲害嘅時候，今日突然出現有心人爆料幫佢澄清，話佢今年5月份剛開機嘅電視劇《巨匠》，楊冪片酬已經由原來的報價1億人民幣降到2700萬人民幣，直降73%，男主角霍建華由原來的1億降到了2500萬人民幣左右。

聽起來有啲匪夷所思，5月份國家稅務政策都未出台，都未限制單一藝人收酬金不得超過5000萬人民幣，點會咁快自己減咁多，蘋果後來了解過件事，發現套劇係楊冪嘅嘉行傳媒出品，而霍建華嘅工作室都有投資呢套劇，咁即係佢哋都係老闆，將來劇集賺錢，佢哋可以得到分紅。

國家有國家政策，但影視圈亦都可以有好方法去破解，如果啲大卡士表面上係減半價拍劇或電影，改為佔投資股份，將減咗嘅錢變成投資，再喺合約寫明部戲賺蝕都可以攞到固定回報分紅，咁樣國家都吹佢哋唔漲，所以好多製作人都擔心政策係咪可以收效，因為好多公司一路都幫藝人做陰陽合同。

精選娛聞，喺晒《娛果》
http://fb.com/appledailyent