當年今日
關於我們

【唱廣東歌好自豪】點樣拯救廣東歌?Eason教路:天堂鳥都要支持

蘋果日報 2016/11/10 00:00

eason廣東歌天堂鳥BOP

陳奕迅(Eason)前日到香港大學出席「大學問」講座,接受台下大學生嘅提問,有男同學問:「好多人覺得o依家樂壇青黃不接,好多人話自你之後冇巨星級歌手。」Eason聞言笑笑話:「即係你當周柏豪係...」男同學答:「周柏豪係打籃球,籃球巨星。」Eason抵死話:「我以為你話周柏豪係靚仔唔計。」
男同學再問:「廣東歌喺全球衰落,有乜方法提高地位?」Eason發揮吹神本色一輪嘴話:「老實講,我真係唔係乜嘢天王巨星,從來唔覺得呢樣嘢,都係個稱呼嚟,其實好唔慣,我心目中天王巨星係譚詠麟、許冠傑、張學友,我做音樂其實越嚟越自我,嚟緊我會出國語碟,大家可能有意見,自己咁睇,我唔係唔恨唱廣東歌,我非常之鍾意唱廣東歌,尤其係廣東歌㖭。」
Eason話自己上年出廣東碟,2014年出國語碟,2013年出廣東EP,2012年出廣東碟,2011年出國語碟:「所以我出國語頻率低過廣東碟,真係唔知廣東歌係咪衰落得咁緊要,因為我仲做緊,如果好似新加坡情況,因為新加坡電台冇得播廣東歌,我覺得冇得播唔等於唔畀聽,我哋又未去到呢個地步,係咪我哋杞人憂天呢?未發生要驚定先?」
Eason解釋點解會出國語碟:「我哋好坦白,點解要做,因為市場大咗好多。」佢仲攞啱啱發問嘅同學,其中有兩位就講國語做例子:「你諗吓,以前喺港大可能唔多講國語朋友,但今日一揀就兩位講國語朋友,係咪代表分薄咗我哋問題?我哋要用廣東話要問廣東話,我覺得點解咁小家,樂壇係咪真係咁差,如果話差,只係覺得要搵多啲唱得好嘅人。」
雖然o依家好多人都話要撐廣東歌,但Eason就話:「我覺得唔使咁快沮喪,老實講我冇刻意唱好多廣東歌,但朋友睇完我喺北京鳥巢騷,其實呢個騷rundown做咗兩年,佢哋話我唱好多廣東話,覺得好自豪,坦白講廣東歌題材闊好多,好自然廣東歌佔比率高。」跟住Eason再講番男同學嘅問題,點樣提高廣東歌地位?Eason話:「問我有乜做到?好簡單我覺得天堂鳥都要支持,多嘢揀係好,但我覺得o依家啲人taste差咗,其實呢樣好主觀,我覺得質素好緊要,大家要清晰選擇有品質嘅嘢,點解我講天堂鳥你哋會笑,我誠心覺得佢哋有付出有努力。」