排頭村位於沙田火車站後山上,山上除有近百戶居民零星分布居住外,亦是通往萬佛寺通道,渠務署在上址進行之污水收集系統工程延誤,對靠山路上落的村民,以及前往萬佛寺的信眾及僧侶,皆造成不便。
「條路咁斜,原本行梯級上山都好啲,但𠵱家因為工程掘起晒,剩番條斜路,落斜時真係好危險,工程停頓超過半年,我都戥啲老人家辛苦。」村民稱,半年多前排頭村通上山的梯級,因工程被掘起,半年後,工程仍原封不動。
動工已久無人開工
村民表示,經常有長者沿斜路前往附近寺院。「條路真係好斜,我行上去都辛苦,你諗吓老人家𠵱家連梯級都冇埋,只可扶住圍欄上斜係幾咁危險,而且冇人開工,都唔知政府部門有冇好好監管。」
記者沿山坡斜路行上排頭村,徒步上斜約需三十分鐘。居於山上村民及僧侶向記者表示,工程停頓已久,「塊地掘起咗,但好少見有工人開工,條路又斜,就算扶住欄杆行上去都唔係容易」。
渠務署回覆本報查詢時表示,渠務署現正在沙田及大埔十九個鄉村/地區進行排放污水設施工程,為吐露港內未有污水排放設施地區,興建污水收集系統,當中包括在排頭村上游道風山地區,即排頭村北部山上地區,敷設總長度約二公里,直徑由150毫米至225毫米排放污水管道。