全城熱爆的世界盃仲有3日就開鑼，中港澳外圍莊家同艇仔早已整裝待發，準備在賭波網大展拳腳，賺幾桶金！有賭波網負責人接受《蘋果》時直言，隨着賭波網絡化，預期今屆世界盃的投注額會比較上屆大增。

「上屆咁多股東夾埋賺到成億，啲partner都分到千萬，希望今年再搵多啲！」本身是澳門人的賭波網負責人Ben，以往一直在澳門搞賭廳，直至10多年前才開始涉足賭波，手上的賭客主要以大陸豪客居多，港人也不少。他坦言搞波網不難，「只要喺整個server，然後埋股(即找股東投資)，再搵啲有實力嘅代理人(即莊家)，由代理人搵駁腳(即艇仔)，只要有客就可以賭。」隨着網絡科技日新月異，只要一個password，一個戶口就賭得，他笑言：「唔少人會趁呢個世界盃，搞個網大撈一筆！」

由於外圍最大的優勢就是不用即時找數，「客戶係篤手指，亦都有折頭畀佢，個個唔同，視乎佢嘅信用額有幾多。」Ben稱賭仔性格就是長賭長有，「世界盃60幾場波，未去到最後一刻都唔知道輸贏，咁樣佢哋至會繼續賭落去！」而萬眾期待的「早餐盤」，就是本周四晚即將上演的世盃揭幕戰「俄羅斯對沙特」，他直言已經收到不少賭仔「問盤」，「我哋有精算師同埋開盤手，睇住世界各地嘅賠率！」

不過賭仔們要謹記，「沉迷賭博，等於倒錢入海」，有需要就打去戒賭熱線1834633求助啦！

你敢爆，我敢獎！ 即Call《蘋果》24小時爆相爆片熱線 ：63836568